Abah Hayang Piknik
CIANJUR – Poe Minggu kamarina, basa balik ti ondangan ti Cipanas, sajajalan uplek ngobrol jeung si Uwa, sobat Abah anu ayeuna jadi dahuan tea, anu harita kapeto mawa mobil. Anu diobrolkeun sagala rupa tea we, ngan lolobana mah dina sabudeureun ulin ka luar kota alias darmawisata alias piknik tea!
“Asa bangun betah nya mun pikinik ka sisi basisir,” ceuk budakna si Uwa.
“Tong ka Palabuan Ratu mun arek mah, ka Ujung Genteng we, masih keneh beresih didinya mah jaba marurah deuih,” ceuk si Uwa bari anteng nyupiran.
“Der ah, urang rencanakeun, cukup meureun dua mobil ge?” ceuk si Ambu mani haget.
“Aaaaah tong diruncunu-rencana sagala, ke we ari geus deukeut kana waktu kumpulkeun, sok tara jadi ari direncanakeun jauh ti memehna teh,” ceuk si Uwa bari der nyaritakeun pangalaman manehna jeung balad-baladna di Pos Wetan. Sok ‘Ras-Jig’ cenah barudak di Pos Wetan mah mun deuk arulin teh.
Baca Juga:
Siga tiheula cenah, ngadarongeng soal ulin ka Bali. Na da harita keneh tatan-tatan sagala disiapkeun kaasup kastrol, beas, samara jeung sambeleun, teu kakantun peda atah jeung peuteuy. “Waaah pokona mah kumplit…plit…plit…we sagala dibawa,” ceuk si Uwa bari nuluykeun hanca dongengna.
Ngadongengna tos lohor, terus siap-siap nepika liwat Ashar, tos Maghrib we cenah mariangna ti Gang Akeng nuju Bali teh. Harita teh cenah pas pisan jeung kajadian Bom Bali. “Apal aya kajadian Bom Bali teh, waktu keur dalahar di hiji kota di Jawa Timur, poho deui ngaran kota na mah, ngan sabot dalahar, dina tipi diberitakeun yen aya bom di Bali,” ceuk si Uwa deui bari nyaritakeun.
Harita ge, ditalek naha rek dituluykeun nyaba ka Bali atawa deuk baralik deui, da pasti kaayaanana keur genting, moal rineh dipake ulinna oge. “Tapi keukeuh kabeh rombongan ge hayang diteruskeun, kagok majarkeun teh, kari sababaraha lengkah deui cenah, piraku kudu bolay,” ceuk si Uwa deui.
Rombongan ahirna nepika palabuan Katapang, pameuntasan ka Palabuan Gilimanuk. Enyaan we cenah kaciri gentingna kaayaan. Kabeh calon panumpang dipariksa hiji-hiji mani imeut pisan. Sagala digaradah, komo deui unggal mobil mah mani imeut pisan.
Waktu mobil rombongan Pos Wetan dipariksa, anu pangheulana kapanggih nyaeta bedog! Pulisi langsung manggil rombongan bari nanya, “Ini apa?” ceuk pulisi mani tandes.
“Bedog pa!” ceuk rombongan teu kireum-kireum.
“Apa itu bedog? Ini golok tau?” cenah.
“Oh iyaaah golok pa….!” ceuk rombongan meh bareng.
“Kenapa bawa golok?” ceuk pulisi deui.
“Yaaa buat saksak-siksik aja pa, kan kami suka masak nasi liwet dan bikin sambal,” ceuk salah saurang.
Baca Juga:
Pulisi tadi langsung nitah ngaluarkeun eusi bagasi. “Nya atuh sagala kaluar, beas, sambeleun, cai dina galon, kompor gas leutik paranti naheur cai keur kopi atawa cai enteh, kaasup oge asin peda atah jeung peuteuy,” ceuk si Uwa bari nyebutkeun.
Pulisi anu mariksa anu tadina kucem, haseum jeung sangar, katingali kunyam-kunyem siga nahan piseurieun. “Jadi apa tujuan kalian ke Bali?” ceuk pulisi deui, teu sangar teuing ayeuna mah nanyana ge.
“Ya cuma ingin berlibur ajah pa, pengen tau Bali, jangan hanya baca di koran dan majalah atau tau dari televisi sajah,” ceuk rombongan.
Ahirna mah cenah di loloskeun bisa naek ferri ka Palabuan Gilimanuk. Sakitu heula we nya para saderek. Wallohu’alam bisshowab. Wassalam.
(***)
Ditulis: Ku: H. Dede Asy’arie