Ku Lukut Saur Baping Oge

CIANJUR –  Ngahaja kamari mah Abah teh nepungan sobat anu ayeuna geus jadi dahuan di Gunteng, rek sina “ngadongeng sual nguseup, butuh keur bahan tulisan we pangpangna mah. Abah mah sok nyebutna teh si Uwa we, sakalian nga-Uwa-keun barudak. Sok leubeut dongengna teh, utamana mah dongeng pangalaman manehna we. Kaasupna si Uwa mah geus jadi Sarjana mun di universitas mah kana per-nguseup-an teh. Manehna mah tara ningali waktu atawa kaayaan, rek kumaha carana nu penting ‘nguseup!’.”

Ku Lukut Saur Baping Oge

Tong sieun beakeun bahan carita nguseup, cenah ceuk si Uwa, naha eta mah rek dongeng pangalaman sorangan, atawa dongeng meunang ngarekayasa ti maranehna.

“Dongeng meunang ngarekayasa kumaha?” Abah panasatan. Enya cenah ceuk si Uwa, siga dongeng hiji tukang nguseup nu nyaritakeun manehna hiji waktu keur nguseup di walungan Citarum, aya nu nyanggut cenah mani tarik, kocap jeujeurna ge ampir ngacleng kabawa katengah cai mun teu gancang ditewak mah. Awahing ku gede pusan laukna sigana mah.

Nguseupna teh, cenah biasa marake Rakit, nepika kabawa rakitna ge. Ditataran tiisuk, tengah poe teh masih keneh nagen, nepika piligenti nyekelan Jeujeur awahing kubeurat nanahan tarikan lauk. Bedug Asar kakarek lauk ngolongkong kabeungeut cai. Horeng lauk Lika cenah ampir sagede lisung.

“Beunang teu Wa laukna?” Abah beuki panasaran.

Baca Juga:

 Menguak Misteri Warna Merah pada Perayaan Imlek

Nyaeta henteu!” ceuk si Uwa bari seuri. Tah nu kitu teh, ceuk si Uwa, nu disebut dongeng rekayasa, dongeng pangrame! Da mun beunang mah, pasti aya buktina, Cecepetna atawa buntutna sok diawetkeun keur bukti.

“Pan nu kungsi meunang lauk Kancra nu ukuran limalas kilo ge, sisitna teh di pajangkeun” ceuk si Uwa deui. Ari dongeng pangalaman mah siga kieu, ceuk si Uwa keneh.

“Ana hiji waktu ngaruseup ka Jangari, diangkir kubabaturan nu bogaeun kolam japung” cenah bari daradad nyaritakeun pangalamanana. Harita teh, aya kana genep urangna, ngan aya hiji sepuh anu sok dilandih Ki Baping anu rada kirang dangu milu kana rombongan, geus almarhum cenah ayeuna mah.

Geus dipapagahan tianggalna ge, mun engke nguseup dikolam ulah di jero, da dipelakan Nila. Nu sejen nguseupna diluar sakumaha nu dipapadonkeun memehna, ngan Ki Baping tea, bubuhan teu pati ngadangu, nya sangeunahna we neangan tempatna oge. Tepika tengahpoe, nu ngaruseup diluar mah jarang disorang teu siga Ki Baping, mani clom giriwil teh lain babasaan, da ditempat nu dipelakan Nila tea.

Baca Juga:

 Hayang Nguseup Deui Di Ciwulan

Barang digorowok-gorowok sangkan ulah nguseup di jero, Ki Baping ukur ngalieuk bari terus bales ngagorowok “Ku lukut yeuh eupananana!!! tuh aki ge mani clom giriwil!!!” cenah bari teu riuk-riuk boga salah! Nu sejen ukur bati gogodeg. Na kudu ngabejaan kumaha deui?

“Tah eta mah dongeng pangalaman sajati teu make rekayasa” ceuk si Uwa bari ngusekeun kuntung kana asbak. Tah sakitu heula we cenah! Ke disambung deui. “Loba keneh dongeng pangalaman tukangnguseup mah” cek si Uwa bari nyuruput Kopi anu kari saparapat gelas deui.

Mung sakitu bae carita Ku Lukut Saur Baping Oge Wallohu’alam bisshowab. Wassalam (***)