Dongeng Abah: NGALIWET MAKE KORNET
CIANJUR – Poe Ahad mangkukna ,adi Abah nelepon , nyaritakeun tos ngariung jeung baladna cenah di pasantren Cipasung Beres teteleponan, pikiran kumalayang ka jaman katukang , puluhan taun ,waktu Abah keur masantren di Cipasung. Matak ayeuna ge rek ngadongeng teh ngeunaan waktu masantren di Cipasung we, ngan pedah nu deuk dicaritakeunana ieu mah khusus urusan ngaliwet .
Jaman harita,lamun geus kadenge sora “ Wallohuuuuuu….! “ ti Madrasah , anu kacipta pasti Liwet na luhur “ Eblek “. ( Eblek teh sebutan barudak santri Cipasung kana Nyiru badag alias Tampir paranti ngariung dahar Liwet “.) Deungeun sanguna , sakapanggihna we, mun keur loba keneh duit tina weselan, meureun make asin Japuh atawa Peda malah tampolana mah sok make De Es , menu deungeun sangu nu istimewa keur santri Cipasung mah, dijieunna tina Tahu jeung Oncom. Ngan palebah duit geus saat, Liwet karo Uyah jeung Cengek ge geus kaasup lumayan ni’mat, paling onjoy make Kurupuk warung hiji sewang. Mun teu kitu ngundeur Daun sampeu langsung diasupkeun kana Liwet , dipake deungeun sangu we , dicoelkeun kana Sambel goang.
BACA JUGA:
Lamun kaparengan manggih Jantung cau, mani siga meunang Lauk bibit bungahna ge. Can kawenehan manggihan santri nu dahar Liwet bari caman-cemen siga nu teu mirasa, saregut we, paheula-heula, pabisa-bisa, da mun teu kitu mah nya kabeakeun ku batur tea. Malah tampolana bakat ku sieun kasoro ku batur, tarekahna teh sok rupa-rupa pisan , tapi teu kudu diungkab nya nu kituna mah bisi eraeun nu sok boga kalakuanana.
Dina hiji waktu, babaturan arudunan meuli Kornet da kabeneran kakarek mareunang wesel ti kolot-kolotna. “ Keur dahar engke, tos ngaji peuting “ ceuk si Didin, nu sejen ge sapuk, minangkana mah hayang ‘ makan malam’ nu rada` pantes, ulah ukur jeung Peda atawa Japuh wae. Beres solat Isya berjamaah, langsung jalicir ka dapur umum metakeun liweteun. Kornet langsung ditunda luhureun liwet nu geus meh asak. Asak liwet si Dedi nyiar Eblek atawa daun cau keur alas liwet. Teu lila si Dedi datang ngan teu mawa Eblek atawa Daun cau, tapi mawa salambar Pelastik, duka urut naon da loba tutulisanana. “ Teu kabagean Eblek euy, Daun cau na ge geus ridil , rajeun aya jauh, aya oge ieu Pelastik, lumayan geus beunang ngumbah “ cenah bari nembrakeun Pelastik.
Liwet panas langsung didaraykeun luhureun Pelastik, Liwet nu geus nyampur jeung Kornet tea. Seungit Kornet mani nyambuang , ngeleketek beuteung nu geus menta eusi. Ngariung Liwet handapeun kamar nu ukur dicaangan ku lampu 5 watt. Liwet nu panas ge teu di tungguan tiisna, tibang ditiupan sakeudeung langsung we dihuapkeun. “ Tingali tuh euy , ari Kornet nu asli mah, kuat ka beureumna ge langsung tembus kana kejo liwet ! “ ceuk si Didin bari ngosom. Nu sejen ukur ngaenyakeun ku unggut-unggutan we da keur ponyo kana Kornet tea.
BACA JUGA:
Wisata Bukit Aquila Pacet Cianjur, Fasilitas Lengkap dan Pesona Alam yang Asri
Teu kungsi sapuluh menit ge Liwet geus ledis, Pelastikna ge mani leucir teu nyesa saremeh-remeh acan, bari nu ngariung masih keneh ngalamotan ramona sewang-sewangan bari jeung kutap-ketap cirining masih hayangeun keneh Liwet. Geus rada lila, keur beberes urut dalahar, si Didin nelek-nelek Pelastik urut tilam tadi. “ Naha nya laleungitan aksara nu tingjareblag tadi teh ? “ ceuk manehna bari teu lila ngehkey seuri semu ni’mat naker. “ Nu beureum tadi teh euy, lain tina kornet, simanahoreng geuning tina aksara nu tingjareblag tadi, pupul kapanasan ku liwet meureun “ cenah bari teu eureun-eureun seuri. Nu sejen ge antukna mah ger-geran sarua milu nyeungseurikeun kalakuan maranehna sorangan. “ Bae lah, dahar jeung kornet make bungbu Cet pelastik ge, buktina mah pedo weee ….! “ ceuk si Dedi bari ngaleos mawa pelastik rek dikumbah cenah keur piparantieun tilam Liwet deui. Sakitu heula we nya, carita ti jurusan Castrology, insya Alloh engke ku Abah di guar deui.
Wallohu’alam bisshowab, Wassalam ! (***)
Ku : H.Dede Asy’a