CIANJUR – Kacida hanjeluna, kamari waktu acara Halal Bihalal Yobek & Sideg Tolek Cianjur teu bisa hadir. Nu kacipta teh dina riungan eta baraceo ngawarangkong ngaguar pangalaman nu waktu jaman keur ngora baheula. Tiheula basa ngariung sababaraha yobek di tepas imah Anto di Pamoyanan, aya keneh nu geus poho kana kaayaan Cianjur jaman baheula.
Waktu nyaritakeun tempat anu pangramena di kota Cianjur, loba keneh nu nyebutkeun ti toko Lili ka kidul anu nepika peuting sok rame keneh ku jelema lalarliwat. Padahal, ceuk abah mah anu masih keneh sok rame nepika peuting teh ti palebah toko Lili ka kaler, pangpangna di hareupeun toko cap Jago. Jaman harita mah angkutan umum luar kota pangpangna anu tujuan ka Bandung sok areureun hula di hareupeun toko cap Jago, sok ngadon ngetem nungguan panumpang anu rek ka Bandung. Matak harita mah toko manisan Mulia Sari, toko cap Jago, warung es krim mang Utay sok maruka keneh nepika peuting da loba nu baralanja keur oleh-oleh.
Baca Juga:
“Aya nu inget keneh teu hareupeun toko Kelom Geulis aya toko naon?” ceuk mang Hepy. Mang Lulu langsung ngajawab, “Aya toko ban Goodyear, di gedengeun na aya warung es krim mang Utay, tuluy gedengeun na aya warung Lebak Wangi anu sohor ku mie goreng, nasi goreng, jeung mie konclong.”
Sabenerna mah geus loba anu laleungitan di Cianjur anu baheulana kacida kajojo-na, saperti studio foto aya kana sababaraha hiji. Diantara studio foto, Multi beulah kidulna deui aya studio foto Ai Lie gigireun toko Bandung Baru. Lamun nu deukeut Gg Rambutan poho deui mun teu salah mah Agfa studio foto.
“Ari nu di Gg Dukuh eta studio naon?” ceuk Nana milu nanya. Mang Hepy ngajawab, “Oh eta mah toko studio Melati nu ko Edi, bari nyebutkeun aya deui foto studio Alam anu di Pasar Baru, om Didi foto studio.”
Baca Juga:
Camping Seru Bareng Bestie di Wisata Alam Pangsalatan Cianjur
Mang Dedi anu ti tadi anteng kana HP nyeletuk, “Ari toko obat harita kawentar toko obat naon, aya nu apal teu?” Mang Hepy langsung ngajawab, “Eta mah toko Eng Seng Tong jeung Po Soe Tong.” Lamun toko sapatu jaman harita mah anu kasohor teh toko BATA jeung toko Tjiliwung.
“Naon deui cing anu ayeuna geus areweuh di Cianjur?” ceuk mang Dedi mani daria naker. “Diantarana mah,” ceuk mang Hepy bari nyebutkeun, “anu ayeuna geus eweuh di Cianjur teh nyaeta kendaraan Bemo anu harita jurusan Cianjur-Warung Kondang anu terminalna di hareupeun bioskop Haji Adil.” Hiji deui, ceuk mang Hepy, “nu geus eweuh di Cianjur teh Sado.” Mang Lulu nyebutkeun, “Loba keneh sado mah, pan eta sok marangkal di pengkolan Syang Hai.”
“Delman eta mah kaseeeeep,” ceuk mang Hepy bari daradag ngajelaskeun yen anu disebut sado mah leuwih jangkung, gilinding leuwih gede, panumpangna patongtong jeung kusir. Mun hayang apal mah tuh tingali di hotel Cipendawa, aya keneh Sado sauth di jieun pajangan di ruang tamu.
Naon deui nya? Sakitu heula we nya, ke di sambung deui. Insya Allah. Wawlohualam bisshowab, wassalam.
Ku: H. Dede Asy’arie