Poe ieu mah, Abah teh deuk ngadongeng su’ul telepon heula nya, da geuning eta anu ngolebat dina pipikiran, waktu mimiti ngahurungkeun Notebook teh. Mun teu salah mah harita teh keur ngadagoan hujan raat, ngariung dina tenda di PWI bari nyaneut Bala-bala haneut.
Harita anu diobrolkeun teh sual ‘Canggihna’ hape jaman kiwari. “Ari anu mimiti nyiptakeun telepon, saha nya?” ceuk hiji wartawan anu langsung harita keneh dijawab ku babaturanana yen anu nyiptakeun telepon teh nyaeta Alexander Graham Bell.
Tapi ceuk babaturanana keneh, lain Graham Bell cenah anu mimitina pisan nyiptakeun telepon mah, bari terus nyebutkeun, yen baheula, cenah, kira-kira taun 1871 aya urang Itali anu ngaranna Antonio Meucci, tah si manehna pisan cenah anu mimiti nyiptakeun pesawat telepon teh.
Baca Juga:
Jadi anu salila ieu urang sok nyebut Alexander Graham Bell anu nyiptakeun Telepon teh, salah kacida. Keun we lah, teu kudu riweuh nyual Alexander Graham Bell atawa Antonio Meucci, urang mah da apal kana anu disebut telepon oge, geus rada ka beh dieunakeun. Apan pangheubeulna ge meureun keur jaman “Telepon engkol,” anu kudu diengkol heula mun rek nelepon teh, tuluy menta disambungkeun ka operator nomer telepon anu dituju.
Waktu harita can aya Telkom tapi masih keneh PTT (Pos, Telepon dan Telegrap). Kabehdieunakeun mah pesawat teleponna geus bisa make nomer langsung, nyaeta urang bisa langsung nelepon ka no tujuan langsung teu ngaliwatan operator, malah beuki dieu beuki maju, bisa nelepon interlokal, malah internasional langsung. Taun 80 an geus mimiti rame ku telepon anu teu make kabel, ngan di urang mah masih keneh sawates anu baleunghar anu ngabogaan pesawat telepon dina mobilna sewang-sewangan can meuweuh siga ayeuna.
Telepon umum cul-cel dimana-mana, mun deuk nelepon ukur kudu sadia duit logam anu disebut koin tea, mun hayang lila nelepona, kudu siap-siap we koin sing loba. (Nu kungsi ngalaman nelponan kabogoh make telepon umum pasti keur nyenghel, seuri koneng da rumasa tea!). Wartel alias Warung Telekomunikasi kacida lakuna jaman harita mah.
Baca Juga:
Abah ge kungsi ngalaman jadi pelanggan Wartel, sabab unggal ngirim berita (harita taun 90-an) sok make Faximile can siga ayeuna ngirim berita cukup ku e-mail. Mun teu salah, Abah mimiti ngalaman boga hape teh taun 98 ahir, meuli hape seken ti Asep Bule (almarhum), hape cinitnit tea ning, ukur bisa nelepon jeung SMS an.
Tah keur usum hape cinitnit mah sigana can pati ngaruksak kana tatanan kahirupan sosial da ukur bisa nelepon jeung SMS an wungkul,anu kacida pisan katingali ngaruksak tatanan sosial mah nyaeta sanggeus bijil hape anu canggih hape android anu sagala bisa tea, Sok we bayangkeun, sagala rupa anu diperlukeun geus sadia, hayang nelepon geus puguh eta mah malah bisa nelepon pajeueung-jeueung ayeuna mah make video call, hayang SMS malah geus aya WA atawa Instagram malah kadieunakeun mah aya anu disebut Telegram, hayang motret geus aya kamera, hayang mideo geus sayagi video, malah gambarna ge geus bisa dikirim via WA jeung sajabana, hayang maen game kari ngaplod aplikasina, hayang lalajo tipi sarua kitu, hayang lalajo pilem tinggal muka Youtube jeung aplikasi pilem, almenak, jam, kalkulator geus nyampak.
Jelema ayeuna geus kabebenjokeun ku anu ngaranna hape android anu canggih tea. Coba we urang tataan, hudang hees anu ditempo hape, beres mandi geus gap deui kana hape, ibu-ibu beres masak, gap deui kana hape, beres daang, muka hape.
Ngariung sadulur-dulur anu geus lila teu panggih, hape angger teu lesot, angger diilikan bisi aya anu asup! Coba we mun keur anteng nyoo hape, pamajikan gogorowokan di dapur ge, angger we api-api teu kadenge, kitu deui pamajikan, sanajan salaki nepika rek pegat urat genggerong ge nyalukan iiiih, jongjon we, api-api teu kadenge, da keur anteng WA an dina grup.
Baca Juga:
Resep Tumis Jamur Shitake, Menu Lezat untuk Makan Malam Spesial
Ceuk Aa Gym mah, jelema ayeuna leuwih mentingkeun meuli pulsa batan sedekah, leuwih loba maca WA, Status FB tibatan maca Al-Qur’an, leuwih sering make Bluo Tooth tibatan berlutut sujud, mun ngadenge hape ngurulung, langsung diangkat teu cara ngadenge sora Adzan, kalahka jongjon internetan. Ibu-ibu anu anyar boga anak, mindeng nyarekan budakna lantaran ngarasa kaganggu lamun keur tik-tokan.
Tah kitu, matak ceuk sobat Abah mah, super duper pisan cenah anu ngaran hape android jaman ayeuna mah, kurang-kurangna bisa mawa mah, matak picilakaeun dunya akherat. Na enya kitu “ Wallohu’alam bisshowab.
Wassalam (***)
[…] Telepon Engkol Nepika Hape Android […]
[…] Telepon Engkol Nepika Hape Android […]