Hayang ka Pangandaran
CIANJUR – Anu pangdipikahayang pisan ku Abah ayeuna, taya lian, iwal ti hayang nyaba bari ngasuh incu ka Pangandaran. Geus welasan taun tara nyaba deui ka Pangandaran teh, padahal tiheula mah keur tugas keneh di Ciamis, teu sirikna saminggu sakali ka Pangandaran teh. Mun teu salah, terahir ka Pangandaran teh kira-kira taun 2006. Harita bareng indit ka Pangandaran teh Asep Ruslih, Man Suparman, jeung alm. Asep Bule Rahmaniawan di supiran ku sobat Abah tea.
Harita ge estuning rasjig teu di awag ti memeh na da mareuting teh di kota Banjar. Alm. Asep Bule ngagugujeg kajeun teu meuting oge, hayang meuleum hurang nu badag di amu. Dina poe isukna isuk-isuk keneh ge geus ngabret ka Pangandaran, kabeneran memeh miang ka Pangandaran, aya anu mekelan keur meuli oleh-oleh, atuh beuki sumanget miang ka Pangandaran teh. Alhamdulillah, jam satengah sapuluh ge geus nepi ka anu dijugjug.
Baca Juga:
Dasar alus milik, di gerbang asup barang rek mayar karcis, aya anu nyampeurkeun, horeng pa Samijan sobat Abah anu sok mantuan neangan bahan keur tulisan. Harita teh cenah manehna jadi Ketua HNSI Pangandaran, numatak rombongan Abah pas hayang ka pangandaran tea mah langsung wae dibebaskeun teu kudu meuli karcis alias gratis. Lain ukur eta, Abah jeung rombongan ge, dibawa ka warung bakar ikan, disuguhan dahar sawaregna. Anu disuguhkeun harita nyaeta Udang masak mentega, Kakap asam manis, Bawal bakar, jeung Cah Kangkung. Alhamdulillah, anggaran keur makan siang weuteuh teu kacoceng.
Ba’da Ashar, saberesna baralanja oleh-oleh bawaeun balik, Abah jeung rombongan ku pa Samijan di bawa ka salah sahiji tokoh Pangandaran anu rek nyalon Bupati pikeun wawancara, da harita teh Pangandaran kakarek persiapan rek jadi kabupaten. Alhamdulillah, memeh Maghrib wawancara beres kalayan lancar. Balik ti imah eta tokoh, sarerea ngarasa bungah da mareunang ang pau, atuh puguh we mulang ti Pangandaran teh, estuning ‘Balakatiktrik Balakacombrang’. Sakitu heula.
Wallohu’alam bisshowab. Wassalam.
Oleh: H. Dede Asy’arie