Ku :H.Dede Asy’arie
Keur puasa kieu mah, anu pangkaciptana taya lian iwal ti dadahareun. Sagala kadaharan oge, kaciptana teh, pingeunaheun, malah ceuk Asep Ruslih, keur puasa kieu komo dina waktu tengah poe ereng-erengan, tong boroning kadaharan atuh, Batu asahan ge mani bangun pulen jeung amis tiis cenah.
Tah poe kamarina, di kantor keur meujeuhna bayeungyang, da poe mani moreret kacida ,deuk hujan badag sigana mah. Anu diobrolkeun mimitina Tukang Cendol deukeut Asia Rancabali, kacipta cenah dina mangsa bayeungyang kitu mun disuguhan Es Cendol anu di Asia, ngalegedep tiis bari amis kareueut tea ning!.
Tidinya obrolan maju kana kaolahan anu jadi primadona dina bulan puasa. “ Top markotop mah, beres Tajil terus dihantem ku Sop buah laju sabatang heula memeh solat Maghrib “ ceuk Asep Ruslih miheulaan.
“Ari sayah mah, buka langsung sholat heula, beres sholat langsung nyiuk Kejo, terus ngahampleu Karedok Leunca jeung goreng asin Japuh, manstaaaap! “ ceuk Iim mairan bari, mani semu kumetap.
Abah mah jadi ras inget jaman keur budak, mun tos Tajil teh sok langsung kana kejo mani sapiring metung, atuh dina waktuna rek solat teh mani engah-engeh da kamerekaan.
Tah ayeuna mah, kabiasaan Abah teh, mun tos Tajil ( biasana ku Korma tilu ese ) mun kabeneran aya, atawa ku Cau, tara langsung kana Kejo, tapi ngahantem Karoket atawa Bala-bala anu dibanjur ku Sambel suuk make Cuka, tara loba sih, paling loba lima atawa genep siki ! Tidinya karek sholat Maghrib.
Ari daang na iraha ? Tah palebah dieu mah Abah teh lain gagayaan, tapi da piraku beuteung rek teu wareg dijejelan Korma tilu atawa Cau hiji, terus Karoket atawa Bala-bala lima atawa genep , komo mun seug bari kaburu ngopi heula , geus leungit we rasa hayang daang Kejo na oge.
Kadangkala , sok aya rasa lapar mun balik Taraweh terus Tadarus di Masjid, nya sok daang Kejo sapuratina mun kitu teh, tapi da mimindengna mah, engke we daang Kejo sapuratina mah sakalian dina daang Sahur, jadi daang Kejo mah salila bulan puasa cukup sakali nyaeta dina waktu daang Sahur.
Kabiasaan siga kitu teh, kusabab tiheula waktu ngalaman puasa di Mekkah, ku sobat Abah dibiasakeun mun buka puasa teh sagala rupa aya, amis-amisna Korma, Arsir ( sirop ), Halawa jeung sajabana, bubuahan tara kaliwat, Cau , Apel, Jeruk jeung Anggur, terus lalawuhna nyaeta kuliner khas bulan puasa cenah ceuk urang Mekkahna oge, nyaeta Samosa ( Sumbusa ) siga Karoket, ngan bentukna segitiga, eusina Cacag daging ( Domba biasana mah), Kentang, Bawang daun, Saledri jeung sajabana.
Tah dina waktu buka teh, Abah mah paling kuat daang Samosa ukur tilu siki, da kaburu wareg ning dieusi, sirop sagelas jangkung, jaba memehna pan nginum cai Zam-zam oge sagelas badag, Samosa tilu, Apel hiji, Jeruk hiji, encan Halawa.
Matak harita keur puasa di Mekkah, daang Kejo mah, engke we balik Taraweh sakalian daang Sahur. Tah kabiasaan harita, kabawa nepika ayeuna, jadi mun tos Tajil ku Korma atawa ku Cau, tara waka ngahantem Kejo, tapi Karoket jeung Bala-bala sawaregna, tuluy dihantem ku Kopi hideung anu kentel bari melenyun, urusan daang Kejo mah, engke we sakalian daang Sahur.
Tah, sakitu heula we nya, Wallohu’alam bisshowab. Wassalam.