Bioskop Jaman Abah Keur Budak

CIANJUR – Carita iyeu ditulis ku H. Dede Asy’arie anu judulna nyaeta Bioskop Jaman Abah Keur Budak abus kana bagian Dongeng abah di Cianjur kuy.

Bioskop Jaman Abah Keur Budak

Baheula mah can loba sarana hiburan siga ayeuna, paling aya oge ‘Korsel’, bari kitu oge tara sabulan sakali ayana, matak munasabah we mun hiburan Abah anu pangdoengna teh nyaeta lalajo pilem di bioskop. Karesep kana lalajo pilem, bubuhan keur budak, kolot-kolot Abah bumen-bumen di Rancabali wetan hareupeun pisan bioskop Roxy anu ka beh dieunakeun robah ngaran jadi Pusaka. Jadi mun aya pilem anu keur ‘semua umur’, teu sirikna unggal poe lalajo, sanajan pilemna can ganti oge.

Lalajo pilem jaman harita, Abah mah cukup menta bako mole ka Mamang nu keur jaga toko pun Aki nu harita balantik kana bako. Tah ku bako mole eta, Abah “nyogok” Bah Ajum nu jaga panto bioskop Roxy khusus keur kelas III. Harita mah, lalajo teh, masih keneh make kelas, aya kelas Balkon, kelas I, kelas II jeung kelas III panghareupna. Resep lalajo bioskop terus kabawa gede, geus rimbitan oge, mun aya pilem rame di Bandung, komo mun seug keur kabeneran dititah ku kolot balanja ka Bandung, sok ngahaja lalajo di bioskop pangalusna sa Bandung jaman harita nyaeta bioskop Paramount di jalan Jenderal Sudirman mun teu salah mah.

Baca Juga: 

Enak! Ini Resep Ungker Jati yang Gurih dan Pedas

Korsina ngeunahaeun make jok, jaba teu hareudang da make A.C., teu mulek ku haseup roko da teu meunang udud, pilemna carekas bari sorana ge teu gerebeg da make sound system khusus keur pilem di bioskop. Jadi sok ras inget mangsa keur budak, mangsa keur meujeuhna beuki lalajo pilem di bioskop. Kaayaan jero bioskop jaman harita estu matak pikawatireun mun ku ukuran jaman ayeuna mah. Urang tataan di jero bioskop Roxy we heula.

Korsina tina kayu panjang anu dijieun sababaraha hiji korsi. Mun kelas hiji tempatna rada luhur tuluy rada mudun nepika rohangan kelas II anu dipisahkeun ku hahalang tina beusi. Kelas II mah rata, ayana di tengah nepika hahalang keur misahkeun antara kelas II jeung kelas III. Tah Abah mah, mun keur budak langka pisan lalajo make karcis kelas II pasti unggal lalajo panghareupna malah tampolana mah tara kabagean tempat diuk, nyangkoyot we dina tatapakan panto asup kelas III.

Lalajona oge can kungsi anu peuting keur budak mah, komo mun poe Ahad, lalajo teh sok anu pangheulana nyaeta jam. 10.00, bubarna pas deuk Lohor. Pilem anu berwarna harita masih langka, jeung pilem layar lebar anu disebut ‘Cinemascope’ oge sarua can pati loba. Lolobana mah pilem teh masih keneh ‘Hitam putih’ bari sorana loba lungit sawareh.

Baca Juga: 

Alasan Dibalik Kenapa Gaun Pengantin Harus Warna Putih

Jaman harita, teu aneh mun keur ngeunah-ngeunah lalajo, jol ‘pret’ we pegat bari teu lila bray dina layar aya pengumaman anu unina kieu “Harap bersabar, film sedang disambung”, pastina we anu lalajo mah pating kulutus, aya oge anu tingsaruit nepika pilem laju deui nuluykeun caritana. Eta mah saleuheung keneh, pangpikasebeleunana mah, mun keur anteng lalajo, jol reup we pareum kusabab pareum listrik, tah eta mah untung-untungan, mun listrikna hurung deui, lalajo bisa dituluykeun, sedeng lamun ti GBO na (PLN ayeuna mah) teu hurung, nya lapur tea we! engke deui we mun listrik hurung deui karek bisa nuluykeun hanca lalajo.

Lalajo pilem di bioskop jaman harita mah aya keneh istilah “Istirahat” sagala, lampu jero bioskop dihurungkeun deui, nu lalajo aya nu ka WC aya nu meuli kadaharan jeung sajabana. Jaman harita, mun lalajo pilem koboy, atawa pilem perang, nu lalajo sok alemprak atawa tingsaruit mun “Nu boga lalakon” (barudak ayeuna mah nyebutna ‘Jagoan’) bijil dina layar bioskop! Nu lalajo jaman harita utamana kaum istri sok marawa Kipas lantaran hawa nyongkab panas, komo mun lalajona anu beurang, da ngan ukur aya Kipas badag dilihureun wangunan bioskop bari anginna mah tara nepika anu lalajo, boro-boro adem siga ayeuna anu dilengkepan ku AC tea.

Rohangan jero bioskop mulek ku haseup roko, kom mun seug kabeneran keur poean lebaran, sigana rohangan bioskop pinuh ku haseup roko lantaran barudak anu tara ngaroko ge, poean lebaran mah siga ‘kokoro manggih mulud’ barudak ge ngadadak nyareundeut roko bari can bisa–bisa acan nyeuseup haseup rokona oge! Sakitu heula we nya.

Wallohu’alam bisshowab. Wassalam (***)