Kokodok Alias Ngobeng Ku Istilah Urang Cianjur
CIANJUR – Dongeng abah nu ditulis diartikel iyeu nyaeta Kokodok alias ngobeng ku, cing saha nu terang naon sih hartina Ngobeng? “Ngobeng“ teh nyaeta hiji istilah urang Cianjur pikeun pagawean ngala lauk anu teu make pakakas alias ngan ukur ngagunakeun leungeun.
Duka timana asalna aya istilah “Ngobeng“, da kecap ‘Obeng‘ mah apanan ngaran hiji pakakas, tapi geus ilahar keur urang Cianjur mah, istilah ‘Ngobeng“ teh. Salian istilah Ngobeng, di Cianjur oge geus ilahar nyarebut ‘Kokodok‘ kana kagiatan ngala lauk ukur ngagunakeun leungeun teh. Di nagri batur ge, ngala lauk teu make pakakas, geus jadi kamonesan. Maranehna mah nyebutna teh “Noodling“.
Kokodok Alias Ngobeng Ku
Mun pangalaman Abah keur budak mah, Ngobeng atawa Kokodok teh, di susukan leutik, mun di nagara batur mah, di walungan badag malah di talaga anu legana upluk-aplak. Di nagara batur mah geus jadi hiji kagiatan olah raga anu jawarana bakal meunang hadiah anu kawilang gede mun diukur ku duit urang mah. Laukna teh siga Lele, ukuranana oge, pangleutikna teh, tara kurang ti 5 (lima) kilo, tampolana mah sok aya anu nepika meunang lauk anu beuratna leuwih ti 10 (sapuluh) kilo.
Baca Juga:
Sok asa kasuat-suat deui Abah mah, jol breh kacipta, waktu keur marak di Citarum waktu keur disaatan da harita teh keur nyieun bendungan Cirata tea. Waktu harita, sarua caritana mah Ngobeng alias Kokodok tea. Tina bebeunangan poe harita diantarana aya lauk Lika, teu gede, ukur opat ramo. Lain beunang ngecrik atawa ngajaring, tapi meunang ‘Ngobeng‘ alias kokodok tea.
Duuuuh, waas kacida, lauk beunang ngobeng tea, ku Mang Yayat (tos almarhum ayeuna mah), nu kabagean ngaliwet, si lauk tadi di potongan jadi lima keureut, bari terus dibaluran ku uyah. Waktu liwet mimiti saat, lauk Lika nu meunang ngeurutan teh, ditunda luhureun daun cau nu dipake nutupan liwet bari terus dikekeb ku turub kastrol.
Da eta mah waktu liwet asak, daging lauk nu lima keureut tadi robah warna jadi koneng, liwet di daraykeun luhureun daun cau meunang meresihan, deungeuna ukur lima keureut lauk Lika tadi, nya ukur pada nyiwitan we da kudu walatra tea. “Atuh gantung areuyeun meureun nya“ ceuk Asep Ruslih bari nangtung rek mareuman internet.
Enyaan pisan tateh, daang liwet sakastrol ku sapuluh urang, karasana ukur saketap, tapi ni’mat naker, da saumurna ge, karek harita ngasaan ngeunahna Lauk Lika ti Citarum. “Ari harita ngala laukna di tua atawa di jaring“ ceuk Man Suoarman. “Nya Dijaring jeung diobeng atuh piraku deui jeung make ditua sagala, pan kaasup pecinta alam nu ngarala lauk harita teh“ walon Abah.
Baca Juga:
Ceuk Man Suparman keneh, jaman keur budak mah mun hayang lauk teh, cukup ku kokodok, ukur mawa lambit atawa ayakan minangka pakakas nu dibawana teh. Ti jam salapan isuk nepika jam satu ge cenah satengah ember mah tara kurang. “Nya timimiti Hurang, Beunteur, Sepat siem, Bogo, Lele, kalan-kalan sok meunang Lauk emas, kalolobaana mah sok Mujaer“ Man Suparman mani siga nu jauh panineungan.
Mun teu kitu, cenah, nyieun kokombongan leutik, terus dihalangan ku babatuan nu aya di susukan, diantep we sapeuting. “Isukna teh, geus pinuh ku lauk we eta kokombongan teh“ cenah bari nyaritakeun deui pangalaman ngala lauk waktu keur budakna. Aya deui cenah cara ngala lauk jaman harita, nyaeta nawu susukan nu geus dibendung.
Mun cai susukan geus meh saat geus katingali tingkucibekna rupa-rupa lauk susukan. “Terus bari ngaliwet eta teh, deungeunna mah jeung beuleum lauk meunang ngala tadi tea we!!“ Man Suparman nyaritana mani semu kumetap, kacipta meureun pedo jeung ni’matna liwet jeung beuleum lauk harita.
Baca Juga:
“Moal bisa kalaman deui sigana mah pa haji, da duka kamarana laukna ge ayeuna mah“ ceuk Asep Ruslih bari ngetruk-ngetruk ududeun. “Da eta atuh diraruksak ku urang-urang keneh, coba we mun teu di tua, di sangkalim, mun teu disangkalim di endrin, aya deui nu ngala laukna make setrum, atuh beak tepika ndog-endogna ge.“ Ceuk Man Suparman mani siga nu keuheul pisan.
Matak cenah pantes mun barudak loba nu teu apaleun nu kumaha rupana Jeler, nu kumaha rupana Kehkel, Julung-julung, Paray, jeung sabangsana. Enya pisan omongan Man Suparman těh, kaalaman pisan ku Abah sorangan , di tanyakeun kunu jadi anak, nu kumaha cenah ari ngaran Jeler teh ? . Emh, deudeuh teuing barudak jeung turunan urang engke. Boa- boa nu ngaran laukna ge engke mah ukur aya dina gambar atawa dina carita wungkul !!!Wallohu’alam bisshowab, Wassalam ! (***)