Dongeng Bubur Cianjur Beda Sareng Bubur Tasik Teh Ning!

CIANJUR – Dongeng bubur dei sierat ku H. Dede Asy’arie diserat sabab aya carita nu ngandung elmu tiap dongeng abah teh.

Poe kamarina, Abah maca postingan budak anu nyebutkeun asa hayang bubur Tasik cenah, da memang manehna lila ngajar di SDN Panglayungan. Jadi langsung kacipta we, lamun Abah kabeneran keur nganjang ka budak anu lalaki di Tasikmalaya, unggal isuk sok ngahaja sasarap Bubur hayam anu sisi jalan di komplek perumahan Bumi Resik Panglayungan. Bubur hayam na oge, tangtu beda jeung Bubur hayam anu aya di Cianjur.

Di Cianjur mah ciri khasna nyaeta make pais bawang daun jeung sok make dipurulukan ku saledri bubuk malah tiheula pisan mah, sok make pais jeroan hayam sagala, dibungkusan laleutik ku daun cau.

Kamari, basa di Tasik mah, buburna mah sarua, da anu disebut Bubur hayam teh, nu puguh mah lain hayam dibubur tapi, beas anu dibuburkeun dipurulukan ku suiran daging Hayam, ngan anu ngabedakeun teh, nyaeta dina ‘purulukna‘ saperti Cakue anu disiksikan laleutik, aya puruluk Tongcay jeung puruluk daun bawang! Kurupukna tara dirames-rames tuluy kana buburkeun siga di Cianjur, tapi dipisahkeun dina wadah sejen.

Baca Juga:

Nginum Cai Sumur Dina Buyur

Kecapna, salian kecap asin, oge sok make kecap amis. Anu ngaran Tukang Bubur hayam di Cianjur, moal hese neangan, da ampir sapaparat jalan anu aya di Cianjur, sok aya wae anu dagang Bubur hayam.

“Sigana mun urang pangangguran ngitung aya sabaraha urang anu dagang Bubur hayam di Cianjur, naha anu dagang isuk-isuk, anu beurang oge anu peuting, aya ratusna nya?“ ceuk Asep Ruslih dina hiji waktu, waktu keur nungguan raat hujan di kantor PWI.

“Matak di urang nepika nyieun patung Bubur Hayam di wewengkon Pacet oge, meureun hayang netelakeun ka balarea, utamana ka urang luar Cianjur, yen Cianjur mah loba pisan anu resep kana Bubur hayam, matak loba oge anu daragang Bubur hayam“ Man Suparman mairan.

Matak teu aneh teu sing, cenah saur Man Suparman keneh, loba pisan anu daragang Bubur hayam sapaparat jalan boh jalur ka Puncak oge jalur anu ka Bandung, tukang Bubur hayam anu dina spanduk daganganana make kecap “Bubur Ayam asli Cianjur“.

Ngan nyaeta atuh, loba anu make spanduk ‘Bubur Ayam asli Cianjur’ tapi ari dina kanyataanana mah “Bubur hayam sakaijreng“ beda pisan jeung Bubur hayam asli Cianjur. Mun ditalungtik, anu ngaran Bubur Hayam asli Cianjur, bisa katangen tina bahan-bahan salian ti buburna.

Kahiji tina Kurupukna anu digunakeun biasana Kurupuk Aci anu warna Koneng jeung hejo atawa beureum, tuluy Kecap anu dipakena pasti Kecap asin, malah merkna oge sok sarua nyaeta Kecap asin kaluaran Pabrik anu aya di Sukabumi (moal disebutkeun merkna bisi pajarkeun iklan). Bungbuna sok aya Petsin jeung Pedes bubuk, ditambah ku Pais jeroan anu ayeuna mah diganti ku Pais Bawang daun, purulukna salian ti Goreng Bawang beureum oge sok aya daun Saledri anu meunang nyacag, geus puguh ari goreng Ati jeung Ampela hayam mah.

Baca Juga: 

Si Ambu Ngalindur Hayang Bubur

Karesep kana jenis buburna oge beda-beda, aya anu resep kana bubur anu encer, aya anu resep buburna teu encer oge teu kentel, tapi aya oge anu resep kana bubur anu kentel.

“Keun we lah, ari su’al bubur kentel jeung encer mah da tangtuna oge beda karesep jalma mah, ngan Ana mah hayang apal, timana mimitina aya anu ngaran kadaangan anu disebut Bubur hayam?“ ceuk Man Suparman anu titatadi anteng kana Hapena.

Sarua Abah ge teu apal, ngan sigana mah, asalna Bubur hayam teh, ti Tiongkok, pedah mindeng lalajo pilem Kung Fu, anu dijerona aya adegan anu keur ngadalahar Bubur, ngan bedana, maranehna mah, ngadalahar Buburna sok dibarengan ku Goreng Cakwe.

Ceuk Asep Ruslih mah, cenah kungsi maca dina hiji majalah, yen Bubur hayam, asalna ti Nagri Cina. Baheula waktu jaman Kaisar Xuanyuan Huangdi anu osok disebut Kaisar Kuning dina taun 238 SM, kajadian usum paceklik anu dilantarankeun ku halodo panjang, nepika di eta nagara kakurangan bahan kadaharan kaasup Pare.