PAWEY AGUSTUSAN
CIANJUR -Biasana beres solat Shubuh teh sok langsung naheur cai keur kopi, kamari mah kalah mener-mener bantal hareupeun tipi ! Atuh puguh…..teu karasa karek sabaraha menit ge, geus kabawa palid deui ku walungan pangimpian. Kahudangkeunkeun ku melenghirna seungit Roti Bakar ! Horeng si Ambu hideng mangnyieunkeun Roti bakar keur mumuluk minangkana mah. “ Tos jam dalapan batur mah tos di parayun nongton pawey , geura sarapan teras nuang obat “ cenah bari nyodorkeun pisin anu luhureuna aya sagepok Roti Bakar gedengeun cangkir eusi Cai Enteh anu masih keneh nyerebung ditambah obat opat rupa dina wadah pelastik leutik.
Kamari teh tanggal 17 Agustus, tanggal anu boga ajen mandiri keur bangsa Indonesia mah. Tanggal di proklamirkeunana kamerdekaan bangsa Indonesia. Ti saprak inget, unggal tanggal 17 Agustus, sok dianti-anti ku rahayat, pangpangna mah hayang lalajo Pawey Agustusan. Unggal tanggal 17 Agustus, ti isuk keneh urang Cianjur anu aya di kota, di desa geus garinding, dangdan siga deuk lebaran, anu dituju biasana puseur kota Cianjur, pengkolan toko Lily sok pangpinuhna jalma anu rek lalajo Pawey Agustusan. Agustusan kamari mah Paweyna dipundurkeun ka tanggal 18 . Rutena ti Jebrod ngaliwa tan jalan Prof. Yamin mengkol ka Warujajar mengkol deui ka jalan Mangunsarkoro laju ka jalan Adisucipto terus ka jalan Siliwangi finis di Pemkab Cianjur .Cenah kitu oge, da pan Abah mah can bisa lunta kamana-mana, awak masih keneh lalungse, lain teu hayang nempo pawey 17 Agustusan. “ Camplang ah pawey ayeuna mah teu siga jaman baheula “ ceuk dahuan Abah anu karek balik lalajo pawey. “ Kalah pagelek-gelek manusa we sapaparat jalan “ ceuk dahuan teh bari nyebutkeun mun seug lain nganteur incuna mah wegah kacida cenah.
Baca Juga:
Waas cenah baheula mah sok hayang panghareupna di hareupeun toko Lily teh, da hayang nempo Kuda Kosong jeung Si Kobih. Ari Abah mah mun keur budak teh pangresepna mun ningali dramben. Kungsi Cianjur ngondang dramben ti Taruna AMN Magelang, nepika ayeuna ge masih keneh inget anu nyekel ‘ Bedug’ na make hiasan Hulu Meong !Jam satengah sawelas, budak nelepon ngabejaan cenah deuk ka Cinangsi- Cikalongkulon , deuk bareng jeung ki lanceuk anu di Perkoneng, da kagok geus sagala diasakan,sakumaha kabiasaan kulawargana unggal 17 Agustus, sakalian rek ngarayakeun Agustusan bari balakecrakan sadulur-dulur we cenah di lembur.”
Di tukangeun imah , geus rame barudak ngayakeun kagiatan rupa=rupa perlombaan. Jadi ras inget waktu keur ngumbara di lembur Singajaya-Cibalong –Tasikmalaya. Unggal 17 Agustus, rebun-rebun keneh ge, geus arobyag, geus pa ginding-ginding ! Malah aya anu can hees sagala da sapeupeuting nyieun kamonesan keur Pawey Agustusan.
Upacara teh mun salah di lapang Parung Ponteng, biasa we siga upacara di Istana Negara make aya Paskibraka sagala rupa; Beres upacara diteruskeun ku Pawey. Duh waas kacida , upacara HUT Proklamasi najan ukur di lembur, tapi da ari enyaan mah geuning teu burung khidmat jeung daria.
Baca Juga:
Unggal lagu Indonesia Raya , pasti aya anu nyeredet kana hate ngarambah bayah nyaliara saawak-awak mawa rasa nepika mata carinakdak !!! Merdekaaaaaa….!!! Dirgahayu Indonesia anu ka 79 “Nusantara baru Indonesia maju “ .Mugia sing langkung Jaya, langkung Barokah kalayan aya dina panangtayungan Hidayah, Inayah sareng Maghfiroh Allah Anu Maha Adil, Maha Rahman tur Maha Kawasa. Aamiiin Ya Mujibassailin, Wallohu’alam bisshowab.
Wassalam. (***)